شعر مهااايط

البارحه بين القناوات شغال
اشوف شعار النبط وش عبوا له
قام يتفاعل ضامري برق وخيال
قامت تجذب من خيالي سيوله
يامكثر الشعار والقيل والقال
كلٍ مع الميدان يشعب ذلوله
دور قناةٍ جاهزه بث وارسال
كان المقدم من عيال الحموله
حرام لو مابه من الشعر مثقال
اهم شئ انك تحبك العموله
ثلاث معروفه ولاحولها جدال
اليا لقاهاواحدٍ صفقوا له
وجهٍ حسين ورزة شماغ واعقال
ومهايطٍ ماشفت عرضه وطوله
والا نغم صوتٍ تجره وموال
كلٍ يعاين مايناسب ميوله
ولا من عيال الثراء واهل الأموال
فلاهي غريبه لاخذيت البطوله
هذي شروط الشعرفي وقتنا التال
وحنا نساير وقتنا الله يهوله
واللي على االتصويت ياعالم الحال
يشجعون اللي كبارٍ حثوله
وحنا قعدنا تالي القوم ياعيال
لا منصبٍ عالي ولابه سيوله
لاجنيهنا جنيهٍ ولاريالنا ريال
ماحدٍ يدور للبن في معلوله
وش لون يبقى مجدنا بين الأجيال
ولا نعلمهم معان الرجوله
وحنا نهايط بالقناوات يالال
ووجيهنا مما نقول مغسوله
فلاصار بيتك مايجي مضرب امثال
فلانته مكلف فالمجالس تقوله
الشعر حبك وسبك واعجاب واشعال
يفرض على كل المسامع قبوله
ماهو مهايط لعنبو اذيك الأشكال
اللي على الماصة تومي رجوله
جهال وتطبل على روس جهال
لاقدمت شعرٍ ولاهي بحوله
ان ضحك ضحكوا كلهم مثل الأطفال
في ذمتي مدري على يش ضحكوله
تكفون ياهل الشعر ماضين الأفعال
تكفون ردواهيبته وافزعواله
مدري من اشكيله ولادري من أسال
ازريت اميز شامته من عذوله
ياهل الحمايا وردوها على الجال
كلٍ على المعنى يورد حلوله